Mae Ambiwlans Awyr Cymru yn dweud ‘diolch yn fawr iawn’ i’w gwirfoddolwyr am eu cyfraniad hollbwysig i waith yr elusen sy’n achub bywydau dros y 25 o flynyddoedd diwethaf.
Cyflwynwyd y deyrnged wrth i’r Elusen ddathlu Wythnos Genedlaethol Gwirfoddolwyr, a gynhelir o ddydd Llun 1 Mehefin i ddydd Sul 7 Mehefin.
Bellach yn ei 42ain flwyddyn, mae’r wythnos yn cydnabod miloedd o wirfoddolwyr ledled y DU, sy’n rhoi o’u hamser i gefnogi elusennau a sefydliadau.
Mae Ambiwlans Awyr Cymru yn dibynnu ar eu gwirfoddolwyr mewn sawl ffordd, ac mae eu cefnogaeth yn helpu i sicrhau y gall y gwasanaeth weithredu 24/7, 365 diwrnod y flwyddyn, yn darparu gofal critigol cyn mynd i’r ysbyty, i’r bobl sydd â’r salwch a’r anafiadau mwyaf difrifol ledled Cymru.
Mae eleni yn arbennig o arwyddocaol i’r Elusen Cymru gyfan, wrth iddi ddathlu 25ain o flynyddoedd ers ei sefydlu, carreg filltir na fyddai wedi gallu bod yn bosibl heb gefnogaeth y cyhoedd a’i gwirfoddolwyr ymroddedig.
Dywedodd Dr Sue Barnes, Prif Weithredwr Ambiwlans Awyr Cymru: “Mae ein gwirfoddolwyr yn bwysig iawn i ni, ac ni fyddem yn dathlu ein 25ain pen-blwydd hebddynt. Maent yn llysgenhadon i’r Elusen, yn rhoi o’u hamser mewn gwahanol ffyrdd i godi ymwybyddiaeth ac arian ar gyfer ein gwaith hanfodol sy’n achub bywydau.
Mae’r “Wythnos Genedlaethol Gwirfoddolwyr” yn gyfle gwych i ddiolch iddynt a chydnabod pa mor arbennig ydyn nhw i ni. Mae eu hymroddiad a’u hymrwymiad i’n gwasanaeth yn anhygoel. Yn syml, ni allem wneud ein gwaith o ddydd i ddydd heb eu cefnogaeth. Ein gwirfoddolwyr yw calon ein Helusen.”
Mae yna lawer o wahanol rolau gwirfoddoli yn Ambiwlans Awyr Cymru, naill ai yn y gymuned, ym maes manwerthu, neu drwy roi sgyrsiau. Mae pob rôl yn cynnig rhywbeth yn ôl. I’r rhai na allant ymrwymo i nifer benodedig o oriau bob wythnos, mae’r Elusen hefyd yn croesawu cymorth ad hoc a gallant ddod o hyd i gyfle sy’n gweddu i’r gwirfoddolwr.
Mae Liz Katz wedi bod yn gwirfoddoli gydag Ambiwlans Awyr Cymru ers Rhagfyr 2025, yn cyfrannu mewn rôl fanwerthu a rôl newydd sy’n cysylltu â’r gymuned.
Ar ôl symud i’r ardal i fod yn agosach at ei theulu, dechreuodd Liz chwilio am ffyrdd i gysylltu â’i chymuned newydd.
Dechreuodd ei thaith wirfoddoli yn ddamweiniol. Wrth siopa yn Wrecsam gyda’i gŵr, gwelodd Liz eitem yn ffenestr siop elusen. Ar ôl mynd i mewn i brynu rhywbeth, roedd profiad y ddau wedi bod mor gadarnhaol, wrth iddi adael, gwelodd Lizboster ‘gwirfoddolwch gyda ni’ a phenderfynodd wneud cais.
Roedd Liz, a oedd wedi rhedeg busnes llwyddiannus iawn am 30 o flynyddoedd yn y gorffennol, yn gallu cyfrannu ei phrofiad helaeth a’i dymuniad cryf i wneud cyfraniad lleol ystyrlon. Daeth yn aelod gwerthfawr ac ysbrydoledig o’r tîm gwirfoddoli yn gyflym.
Mae gwirfoddoli wedi rhoi’r union beth yr oedd Liz yn gobeithio ei gael ar ôl symud i’r ardal: cysylltiad, diben ac ymdeimlad o berthyn yn ei chymuned newydd.
Dywedodd: “Rwyf wedi symud i’r ardal yn ddiweddar ac roeddwn yn awyddus i gwrdd â phobl a dod i adnabod y gymuned. Roedd gwirfoddoli i elusen leol mor bwysig yn teimlo fel anrhydedd.
“Rwyf wir yn deall yr effaith y mae Ambiwlans Awyr Cymru yn ei chael, ac roeddwn yn awyddus iawn i roi o fy amser.”
Mae Graham Hirst, o Abertawe, yn un o wirfoddolwyr pybyr Ambiwlans Awyr Cymru. Derbyniodd gydnabyddiaeth yn ddiweddar yng Ngwobrau Uchel Siryf Gorllewin Morgannwg 2026 am ei wasanaeth hirhoedlog i’r elusen.
Mae Graham yn wyneb adnabyddus ym mhencadlys Dafen yr Elusen yn Llanelli.
Mae llawer wedi newid ers i Graham ddechrau gwirfoddoli, ond yr hyn sydd wedi aros yn gyson yw ei ymroddiad i’r achos. Gellir dibynnu arno bob amser i helpu pan fydd angen, o roi sgyrsiau i grwpiau, i roi trefn ar focsys arian a chefnogi ymgyrchoedd codi arian.
Penderfynodd Graham wirfoddoli ar ôl ymddeol yn gynnar. Dywedodd: “Rwy’n gweithio gyda chriw gwych o bobl. Maen nhw’n ymroddedig iawn. Pan wyf yn gweld hofrennydd yn esgyn i’r awyr, mae’n hyfryd. Rydym yn rhan o hynny. Mae bywydau pobl yn cael eu hachub oherwydd ein gwirfoddolwyr.”
Mae angen i’r Elusen godi £13 miliwn bob blwyddyn i gadw ei hofrenyddion yn yr awyr a’i cherbydau ymateb cyflym ar y ffyrdd.
Gall pobl o bob oed a gallu wirfoddoli. Mae cyfleoedd ar gael iddyn nhw ddysgu sgiliau newydd, cwrdd â phobl newydd a gwneud gwahaniaeth ystyrlon.
Wrth drafod buddion gwirfoddoli, dywedodd Danielle Higgins, Cydlynydd Ymgysylltu â Gwirfoddolwyr yr Elusen: “Mae gwirfoddoli yn gyfle gwych i wneud ffrindiau, ennill sgiliau newydd a phrofiad ac mae hefyd yn edrych yn wych ar eich CV. Gall gael effaith gadarnhaol hefyd ar eich llesiant eich hun, wrth wneud gwahaniaeth gwirioneddol i eraill.
“Nid yw profiad blaenorol yn angenrheidiol, a gallwch ddewis yr oriau y byddwch yn gwirfoddoli. Os ydych yn 18 oed neu’n hŷn, yn frwdfrydig ac yn barod i gefnogi’r Elusen, byddem wrth ein boddau yn eich croesawu i ymuno â ni.
“Drwy wirfoddoli i ni, byddwch yn helpu i godi proffil Ambiwlans Awyr Cymru, cefnogi eraill yn y gymuned, a helpu’r Elusen i barhau gyda’i gwaith yn achub bywydau ar hyd a lled Cymru.”
Os ydych yn ystyried gwirfoddoli, beth am gymryd y cam cyntaf? I ddysgu mwy, cysylltwch â’r tîm gwirfoddoli ar volunteering@walesairambulance.com
