Mae Ambiwlans Awyr Cymru yn bartneriaeth rhwng y trydydd sector, y sector cyhoeddus a’r sector preifat – gyda phartneriaid o’r byd meddygol ac o’r diwydiant hedfan.
Mae’r elusen yn ariannu’r hofrenyddion a’r cerbydau ymateb cyflym, felly rydym yn dibynnu ar eich rhoddion hael chi i gyllido pob taith.
Ym mis Mawrth 2022, gwnaethom gyhoeddi ein partner hedfan newydd, Gama Aviation Plc, a dechreuwyd trosglwyddo o’r hen ddarparwr i Gama. Roedd ein hymddiriedolwyr wedi dod i benderfyniad ar y contract, sy’n werth £65 miliwn, yn dilyn proses gaffael fanwl dros 18 mis a oedd yn cynnwys mewnbwn gan weithwyr proffesiynol o’r byd meddygol ac o’r diwydiant hedfan.
Gama Aviation sy’n darparu ein peilotiaid a’n peirianwyr gyda chontract i gynnal y gwaith a’n fflyd o hofrenyddion H145. Maent hefyd yn gyfrifol am ddarparu hofrennydd H145 wrth gefn fel bod yna ddarpariaeth gyflawn ar gael yn ystod cyfnodau o gynnal a chadw’r hofrenyddion eraill.
Fel y rhagwelwyd, o ganlyniad i’r cynnydd yng nghost nwyddau a gwasanaethau yn fyd-eang, ynghyd â chontract hirdymor newydd, roedd yna gynnydd sylweddol yn yr arian sydd ei angen i gyflenwi’r gwasanaeth hwn sy’n achub bywydau. Felly, roedd ein targed i gynnal y gwasanaeth awyr hwn a’n cerbydau ymateb cyflym wedi codi o £8 miliwn i £11.2 miliwn y flwyddyn.
Dim ond gyda’ch cefnogaeth chi y gallwn weithredu!
Trosglwyddo i ddarparwr hedfan newydd
Mae newid darparwr hedfan yn gymhleth iawn gan ystyried y bobl arbenigol sy’n darparu’r gwasanaethau – yn yr achos hwn, roedd yna beilotiaid wedi parhau gyda’r gwasanaeth ond roedd hefyd angen chwilio am 11 peilot ATPL H145 HEMS arall a allai weithredu yng Nghymru, ynghyd â’r peirianwyr hanfodol.
Diolch i’r cydweithrediad rhwng y darparwr blaenorol Babcock, a oedd wedi bod yn bartner i’r elusen ers sawl blwyddyn, a’r darparwr gwasanaeth newydd GAMA Aviation, llwyddwyd i gyflawni’r broses drosglwyddo yn weddol esmwyth.
Yn wir, oherwydd eu gwaith caled, cyflawnwyd y gwaith trosglwyddo 18 diwrnod yn gynnar! Roedd y gwaith a wnaeth y ddau sefydliad wedi sicrhau bod y bobl wedi cael pob gofal a bod yr offer peirianneg wedi’i drosglwyddo’n effeithlon. Hefyd, rhaid cofio bod Ambiwlans Awyr Cymru hefyd wedi ymgymryd â’r cyfrifoldebau prydles ar gyfer tri o’r hofrenyddion yn uniongyrchol – penderfyniad a wnaed i roi lefel ychwanegol o amddiffyniad mewn cyfnod o ansicrwydd economaidd cynyddol.
I’r Awyr
Ar ôl y trosglwyddiad, cododd yr hediad cyntaf o Faes Hofrennydd Caerdydd bythefnos cyn y Nadolig, ac roedd hi’n foment emosiynol i’r peilot profiadol James Grenfell, Pennaeth Gweithrediadau Hedfan Gama Aviation yng Nghymru.
Dywedodd: “Mae Ambiwlans Awyr Cymru yn mynd â’r adran achosion brys at y claf ym mhob cwr o Gymru. Yr hofrennydd H145 yw’r pinacl absoliwt o’r hyn sydd ei angen arnom ar gyfer gwasanaethau meddygol brys ac ar gyfer Cymru. Mae’n gallu cario’r tanwydd, mae’n ddygn, a gall lanio yng ngardd gefn rhywun.
“O safbwynt diogelwch, mae gan y diwydiant hedfan brotocolau llym. Mae gan yr holl hofrenyddion drefn gwasanaethu drylwyr. Mae’n cynnwys popeth fel archwiliadau dyddiol, arolygiadau wythnosol, niferoedd o oriau, 100-awr, 200-awr, 400-awr, 800-awr, arolygiadau blynyddol ac arolygiadau afionig.
“Mae’r hofrenyddion yn cael eu cynnal a’u cadw ar lefel eithriadol o uchel.”
Dwi’n gweld yr hofrenyddion yn aml, ond wrth weld yr hofrennydd cyntaf hwnnw gyda’r sticer Gama arno fel rhan o ymgyrch newydd Ambiwlans Awyr Cymru, daeth hynny â deigryn i’m llygad bron.
Roedd yn anhygoel.
Beth sy’n dod nesaf?
Y newid cyffrous nesaf ar gyfer ein hofrenyddion fydd uwchraddio ein H145 i’r D3, sef fersiwn 5 llafn o’r hofrennydd. Bydd peirianwyr GAMA yn uwchraddio rhai o’r hofrenyddion i osod llafn arall. Mae’r uwchraddiad yn cynnig budd sylweddol i gleifion oherwydd bydd y cerbyd yn dirgrynu llai, yn fwy sefydlog ac yn gallu cario mwy o lwyth defnyddiol. Bydd y gwaith ei hun yn cymryd tua X o oriau, gyda X o bobl, ac wrth gwrs, byddwn yn rhaglennu’r gwaith i sicrhau mai dim ond un hofrennydd fydd yn cael ei addasu ar y tro gan sicrhau bod y fflyd lawn o bedwar hofrennydd bob amser ar gael i’r rhai mewn angen.
Lifrai’r cerbydau
Ydych chi erioed wedi meddwl sut mae ein hofrenyddion yn cael eu trosi o hofrennydd safonol i ambiwlans awyr? Neu, sut rydym yn eu dylunio i arddangos y ddraig goch adnabyddus a welwch yn yr awyr. Mae’r fideo hwn yn dangos sut:
