Mae Wythnos Ambiwlans Awyr 2026 yn cael ei chynnal rhwng 7 a 13 Medi, er mwyn codi ymwybyddiaeth o’r gwaith y mae elusennau ambiwlans awyr yn ei wneud i achub bywydau ar draws y DU.
Yma yng Nghymru, mae Ambiwlans Awyr Cymru yn darparu gofal uwch cyn cyrraedd yr ysbyty 24/7 ar gyfer y genedl gyfan.
Mae’r wythnos ymwybyddiaeth genedlaethol yn dod ag elusennau ambiwlans awyr o bob cwr o’r DU at ei gilydd i rannu un neges bwerus: “Mae Pob Taith yn Dechrau gyda Chi”.
Mae criwiau ambiwlans awyr yn cael eu hanfon i dros 137 o achosion achub bywydau bob dydd ar draws y DU, gyda phob achos yn bosib bron yn gyfan gwbl oherwydd cefnogaeth y cyhoedd. Yng Nghymru, mae’r gwasanaeth ambiwlans awyr yn cyrraedd tua 3,600 o argyfyngau bob blwyddyn sy’n bygwth bywydau neu sy’n fygythiad i goesau neu freichiau.
Yn 2026, mae Elusen Ambiwlans Awyr Cymru yn nodi ei phen-blwydd yn 25 oed, ar ôl cyflawni dros 58,000 o deithiau ers ei sefydlu yn 2001.
Yn ystod Wythnos Ambiwlans Awyr, bydd yr Elusen yn rhannu straeon y bobl y mae eu bywydau wedi cael eu hachub gan y gwasanaeth, yn ogystal â thaflu goleuni ar y rhai sy’n cyfrannu, fel y criwiau, gwirfoddolwyr a chefnogwyr.
Dywedodd Dr Sue Barnes, Prif Weithredwr Elusen Ambiwlans Awyr Cymru: “Nod Wythnos Ambiwlans Awyr yw codi ymwybyddiaeth o’r gwaith hollbwysig y mae ambiwlansys awyr yn ei wneud yn achub bywydau ar draws y DU, gan gynnwys yma yng Nghymru. Ni yw’r unig elusen ambiwlans awyr benodedig yn ein gwlad.
“Mae pob taith yn dechrau gyda’n cefnogwyr ymroddedig. Nawr ac yn y dyfodol, ein nod yw bod yno pryd bynnag a lle bynnag y bydd ein hangen. Ni fyddai hyn yn bosib heb y bobl anhygoel ledled Cymru sydd wedi cymryd Ambiwlans Awyr Cymru i’w calonnau ac wedi dangos angerdd diwyro dros yr Elusen a’i gwaith ers dros 25 mlynedd.”
“I’n cefnogwyr a’n gwirfoddolwyr – diolch. Rydych chi’n helpu i achub bywydau ac i wella canlyniadau i gleifion bob dydd.”
Mae gwasanaeth Ambiwlans Awyr Cymru yn cael ei arwain gan ymgynghorwyr, gan fynd â thriniaethau o safon ysbyty at y cleifion ac, os oes angen, eu trosglwyddo’n uniongyrchol i’r ysbyty mwyaf priodol ar gyfer eu salwch neu anaf. Mae’r gwasanaeth yn cael ei ddarparu drwy bartneriaeth unigryw rhwng y trydydd sector a’r sector cyhoeddus.
Rhaid i Ambiwlans Awyr Cymru godi £13 miliwn bob blwyddyn, wedi’i ariannu gan gymunedau lleol a chefnogwyr ymroddedig. Ar gyfartaledd, mae taith mewn hofrennydd a thaith mewn car gofal critigol yn costio £3,545 gyda’i gilydd.
Mae’r Gwasanaeth Casglu a Throsglwyddo Meddygol Brys (EMRTS) yn cyflenwi ymgynghorwyr hynod o fedrus ac ymarferwyr gofal critigol o’r GIG sy’n gweithio ar gerbydau’r Elusen.
Mae’r uwch ofal critigol hwn yn cynnwys y gallu i roi anaesthesia, rhoi trallwysiadau gwaed a chynnal llawdriniaethau bach, a hynny i gyd ar leoliad y digwyddiad.
Fel gwasanaeth i Gymru gyfan, bydd ei griwiau ymroddedig, ble bynnag maen nhw wedi’u lleoli, yn teithio ar hyd a lled y wlad i roi gofal achub bywyd mewn argyfwng.
Yn ystod Wythnos Ambiwlans Awyr eleni, mae Ambiwlans Awyr Cymru yn galw ar bobl ledled Cymru i gefnogi’r Elusen fel y gall barhau i gyrraedd cleifion fel Mandy Reynolds pan fydd angen gofal critigol brys arnyn nhw.
Y llynedd, roedd Mandy yn mwynhau taith gerdded ar Ben y Gogarth pan lithrodd ar greigiau geirwon, a bu’n rhaid i dîm Ambiwlans Awyr Cymru gael ei anfon i’w helpu.
Ar ôl iddi ddisgyn, fe wnaeth y fam i ddau ddioddef toriad triphlyg agored cymhleth iawn gan ddadleoli ei ffêr yn llwyr. Yn ddiweddarach, cafodd Mandy lawdriniaeth blastig ac orthopedig, a bu’n rhaid iddi ddysgu cerdded unwaith eto.
Dywedodd Mandy: “Rwy’n hynod o ddiolchgar i griw Ambiwlans Awyr Cymru, a ddaeth i fy achub pan oeddwn mewn angen brys. Fe wnaeth sgiliau tîm Ambiwlans Awyr Cymru roi ail gyfle i fi ac achub fy nhroed. Fe fyddaf wastad yn ddiolchgar iawn i’r gwasanaeth ac i bawb sydd wedi fy helpu yn ystod y digwyddiad hwn a newidiodd fy mywyd.”
Os hoffech chi gymryd rhan yn ystod Wythnos Ambiwlans Awyr, mae sawl ffordd y gallwch chi gefnogi Ambiwlans Awyr Cymru. Ewch i www.walesairambulance.com/support-us/ways-to-donate -donate
